Tilskot til inkludering av barn og unge – ei ordning som gir moglegheiter
Publisert
Bufdir forvaltar tilskotsordninga for inkludering av barn og unge, som sidan 2022 har bidrege til å skape møteplassar, ferie- og fritidstilbod og tilbod om ungdomslos for barn og unge som står i fare for å hamne i utanforskap.
Ei fersk evaluering frå Oslo Economics viser at ordninga er både relevant og treffsikker, og at ho blir opplevd som avgjerande for kommunar og organisasjonar som ønskjer å styrkje det førebyggjande arbeidet.
Fleksibilitet og lokal forankring
Terje Grytten, direktør i avdeling for tilskot, er glad for det rapporten viser.
– Tilskota har gjort det mogleg å etablere opne møteplassar, gjennomføre ferieaktivitetar og gje barn og unge tilgang til fritidsaktivitetar. Dette gir fleire høve til å delta i fellesskap, oppleve meistring og byggje sosiale nettverk, og vi veit at dette er viktige faktorar for å førebyggje utanforskap, seier han.
Kommunane har ei nøkkelrolle i ordninga, mellom anna gjennom rangering av søknader og koordinering av lokale aktørar. Grytten meiner at dette bidreg til auka samarbeid mellom offentlege og frivillige aktørar, noko også rapporten peikar på.
– Rapporten viser at når kommunane blir eit kontaktpunkt, aukar samarbeidet på tvers av aktørar. Dette er ein gevinst som styrkjer det samla tilbodet til målgruppa, seier han.
Populær og etterspurd ordning
Evalueringa viser at ordninga treff eit stort behov. Oversøkinga er betydeleg, om lag 290 prosent for 2025, noko som understrekar kor viktig tilskota er for kommunar og organisasjonar. For kommunar blir ordninga endra til programtilskot frå 2027, medan ordninga blir vidareført for frivillige og private. Grytten meiner at dette kan gje ein god balanse.
– Ei programfinansiering til kommunane vil sikre kommunane handlingsrom til å prioritere tiltak og ressursar etter dei behova barn og unge har lokalt, og til å tilpasse innrettinga på tiltaka til dei lokale forholda. Med ei vidareføring av tilskotsordninga for frivillige får ein òg målretta tiltak der det trengst, og denne kombinasjonen meiner vi er positiv, seier han.
Bufdir – ein profesjonell og effektiv forvaltar
Rapporten peikar på at ordninga blir oppfatta som svært relevant for søkjarane, og at ho treff eit viktig behov hos kommunale, frivillige og private aktørar. Grytten er glad for at Bufdir blir vurdert som ein god forvaltar av ei kompleks ordning som med fordel kan bli enklare.
– Vi har allereie høve til å gi fleirårige tilskot, noko som gir auka føreseielegheit og reduserer ressursbruken. Får vi tydelegare kriterium, enklare rapportering og betre forventingsstyring, veit søkjarane kva som krevst, og det er med på å gjere forvaltninga av ordninga endå betre.
Men hovudkonklusjonen er klar: Sjølv om tilskotsordninga er stor og ambisiøs, gir ho barn og unge moglegheiter til deltaking og meistring og bidreg dermed til eit meir inkluderande samfunn, seier han.