Tilskot til oppgradering av krisesenterbygg

Kommunar med krisesenter lokaliserte i kommunen. Dersom fleire kommunar samarbeider om eit krisesenter skal kommunen der senteret er lokalisert søkje om tilskot og stå som ansvarleg for søknaden.

Det kan tildelast tilskot til:

• Tilskotet skal finansiere kostnader ved renovering, tilpassing og utskifting av ueigna bygningar og krisesenterlokale.
• Det blir ikkje tildelt statleg tilskot dersom aktuelle bygningar og lokale har kommersiell eigarskap og drift.

Det statlege tilskotet dekkjer inntil 50 prosent av kostnadene til kommunen.
Tilskotsordninga erstattar ikkje det økonomiske ansvaret kommunane har for
Krisesentertilbudet.

Målet med tilskotsordninga er å stimulere kommunane til å oppgradere, fornye eller utvide krisesentera.

Målgruppa for krisesentertilbodet er kvinner, menn og barn utsette for vald i nære relasjonar, og som har behov for rådgiving eller eit trygt og mellombels butilbod.

Søk om tilskot ved å fylle ut og sende inn skjema i Bufdirs søknadsportal.

Det blir opna for at same kommune kan setje fram både forenkla og ordinær søknad.

Forenkla søknad

Dersom kommunen ønskjer å få utført eitt eller fleire mindre og lite kompliserte tiltak, og tiltaka har ei samla kostnadsramme på kr 50 000 – 400 000 inkludert eigenfinansieringa til kommunen (minst 50 prosent), kan kommunen søkje om tilskot ved forenkla søknad.

Forenkla søknad vil ha noko reduserte krav til behovsbeskriving og dokumentasjon, og vurderinga til kommunen av behovet for utbetringar vil tilleggjast stor vekt ved forenkla søknad.

Søknadsbeløpet ved forenkla søknad er kr 25 000 – 200 000. Søknadsskjemaet gir føringar for kva opplysningar som skal givast.

Ordinær søknad

Dersom kommunen ønskjer å utføre meir omfattande tiltak, eller tiltaka har ei samla kostnadsramme på meir enn kr 400 000 inkludert eigenfinansieringa til kommunen (minst 50 prosent), må kommunen søkje om tilskot ved ordinær søknad.

Ordinær søknad må altså nyttast når søknadsbeløpet er høgare enn kr 200 000.
Søknadsskjemaet gir føringar for kva opplysningar som skal givast.

Vi ventar å vere ferdig med saksbehandlinga i byrjinga av oktober 2025.

Tilskotet blir utbetalt til kommunen. Vilkår for utbetaling og informasjon om utbetalingsterminar følgjer av tilskotsbrevet.

Vedtak gjorde i samsvar med regelverket for tilskotsordninga er ikkje enkeltvedtak etter forvaltningsloven § 2 første ledd bokstav b, jfr. § 3 første ledd, og kan ikkje klagast på.

Dersom de må søkje om forlenging av prosjektperioden, utsett rapporteringsfrist, eller omdisponering av tilskotsmidlar, må de gjere dette så tidleg som mogleg.

Det blir normalt ikkje gitt løyve til vesentlege endringar i prosjektet eller store forlengingar av prosjektperioden.

Søknad om omdisponering eller utsetjing blir send inn gjennom søknadsportalen av den som er søknadsansvarleg for prosjektet. Logg inn, vel " "Søknadene mine" i toppmenyen, klikk på "Innsendte", vel den aktuelle søknaden, klikk på "Andre val" i menyen øvst, og vel anten "Utsettelse" eller "Omdisponering".

Om de ikkje får gjennomført prosjektet de har fått tilskot til, må de så snart som mogleg gi beskjed til oss om det. De vil då få informasjon om korleis tilskotet skal betalast tilbake til Bufdir.

Dersom de ikkje har brukt opp midlane de har fått, må de betale tilbake det som er unytta til oss. Det er også mogleg at vi vil krevje tilbakebetaling av tilskotet dersom prosjektet ikkje er gjennomført i tråd vilkåra for tildelinga eller i strid med den opphavlege søknaden og/eller dersom rekneskapen ikkje kan godkjennast.

Dersom de må endre på prosjektet, ikkje får gjennomført prosjektet eller må betale tilbake midlar, vil dette normalt ikkje påverke moglegheita til å søkje om tilskot i framtida.

Rapporteringa skal vise at målet med tilskotet er oppnådd og korleis tilskotsmidlane er nytta. Krava til rapportering er litt mindre omfattande i tilfelle der tilskotet er tildelt gjennom forenkla søknad. Rapporteringsskjemaet vil gi detaljerte føringar for kva opplysningar som skal givast.

Rekneskapen skal vere revidert. Rekneskapen må vere attestert av kommunerevisjon eller annan statsautorisert revisor.

Frist for rapportering følgjer av tilskotsbrevet.

Tilskotsmottakar skal sende rapport og rekneskap til direktoratet gjennom søknadsportalen på fastsett skjema.