Ny rapport: Kompetansesatsing har styrkt det kommunale barnevernet
Publisert
13. februar inviterte Bufdir til lansering av den siste rapporten i følgjeevalueringa av kompetansesatsinga for det kommunale barnevernet. Funna gir verdifull innsikt som styrkjer kunnskapsgrunnlaget for vidare kompetanseutvikling i barnevernet. Dei viser at satsinga har bidrege til auka kompetanse innan leiing, drift og metodar. Ho har òg fremja fagleg fellesskap og samarbeid på tvers av kommunar og blant aktørar rundt barnevernstenestene.
– Kompleksiteten i arbeidet til barnevernet fortener at det blir satsa på kompetanseutvikling. Dei siste sju åra har vi derfor teke konkrete grep for å byggje gode kompetansestrukturar og støtte kommunane i deira ansvar for å sikre at dei har den kompetansen dei treng i tenestene sine, seier Tove Bruusgaard, divisjonsdirektør i Bufdir.
Framover vil Bufdir mellom anna vere opptekne av å henta inn meir kunnskap om kompetansebehovet i barnevernet, framleis sikre god kunnskap om effekten av tiltaka og utvikle nye tiltak ved behov.
Sjå lanseringa av rapporten
Om evalueringa
Kompetansestrategien Meir kunnskap – betre barnevern. Kompetansestrategi for det kommunale barnevernet 2018–2024, har hatt som mål å auke kvaliteten i kommunetilbodet til barn, ungdom og familiar. Han skulle dessutan førebu kommunane på barnevernsreforma som tredde i kraft i 2022.
Følgjeevalueringa viser mellom anna at kompetansesatsinga har bidrege til å styrkje grunnlaget for god drift av det kommunale barnevernet. Det har skjedd ved å tilføre kompetanse til tilsette og bidra til at fleire har arbeidd med utvikling av eigne tenester i perioden. Ho har òg bidrege til eit viktig fellesskap om fagutvikling på tvers av kommunar og styrkt kompetansen hos aktørane rundt barnevernstenestene. Dette er noko som kan bidra til å støtte kommunane i å utvikle og nytte kompetansen i praksis framover.
Bufdir har evaluert fem tiltak som inngår i strategien: tenestestøtteprogrammet, kommunale læringsnettverk, nye vidareutdanningar i barnevern, rettleiingsteam og dialogmøte. Følgjeevalueringa har løpande sett på korleis tiltaka har vore sette i verk og verka og gitt innspel til justeringar undervegs.
Denne rapporten utgjer den siste analysen i følgjeevalueringa av kompetansesatsinga, og omfattar ein tverrgåande analyse av dei fem tiltaka. Den tverrgåande analysen har undersøkt følgjande tema:
- Samanhengen mellom tiltaka
- Kva for effektar og måloppnåing satsinga har hatt
- Anbefalingar for Bufdirs vidare arbeid med kompetansesatsinga
Vil du vite meir?
Alle følgjeevalueringane er publiserte på bufdir.no. Her finn du òg meir informasjon om kompetansesatsinga i det kommunale barnevernet.