Ny rapport: Universell utforming styrker deltaking og sjølvstende
Publisert
For første gong har Folkehelseinstituttet (FHI) kartlagt og beskrive forsking frå Norden om betydninga av universell utforming for den generelle befolkninga og ulike befolkningsgruppers levekår, livsutfolding og samfunnsdeltaking.
Til saman beskriv rapporten funn frå 120 nordiske studiar, og 47 er frå Noreg. Studiane er publiserte i perioden 2016 – 2026.
Resultatet er rapporten Forskning om betydningen av universell utforming for ulike befolkningsgruppers hverdagsliv og samfunnsdeltagelse i Norden.
Rapporten er utarbeidd på oppdrag frå Bufdir.
Relevant for ulike samfunnsområde
Rapporten viser at universell utforming bidreg til auka sjølvstende, større samfunnsdeltaking og betre meistring i kvardagen. Motsett kan manglande universell utforming ha mange og alvorlege konsekvensar. Til dømes kan det hindre folk frå å reise og delta i aktivitetar, og føre til at einskilde mistar tilgang til grunnleggande tenester og rettar. Andre rapporterer at dei opplever utryggleik, utmatting og ei kjensle av å vere usynleg grunna manglande universell utforming.
Rapporten vil inngå som ein del av Bufdirs kunnskapsgrunnlag for å vurdere framtidige tiltak og kunnskapsbehov på området.
– For Bufdir er det viktig å samle og beskrive den forskingsbaserte kunnskapen vi har om betydninga av universell utforming. Rapporten viser kvifor det trengst eit langsiktig og systematisk arbeid på området på tvers av sektorar, seier Bufdirs direktør Eve Vangsnes Bergli.
Ho presiserer at rapporten er viktig for fleire enn Bufdir:
– Rapporten gir innsikt i ei rekke ulike samfunnsområde, som transport og utdanning. Vi jobbar difor for at alle relevante direktorat og departement er kjende med innhaldet i rapporten, og aktivt tek denne kunnskapen i bruk når nye tiltak blir utforma.
Behov for meir forsking og kunnskap
FHI presiserer at rapporten dekker eit omfattande materiale og gir eit detaljert og brukarnært bilete av barrierar som personar med funksjonsnedsetjing møter i kvardagen som følgje av manglande universell utforming. Samtidig peikar rapporten på fleire kunnskapshol. Resultata bør difor tolkast og brukast med ei viss aktsemd.